2 Шоҳлар 18

¹Довуд ёнида юрган одамларини бир жойга тўплаб, улар устидан мингбошилар, юзбошилар тайинлади.

²Сўнг уларни Йўаб, унинг акаси Абушай ва Гатлик Этхайнинг назорати остида уч қисмга бўлиб жўнатди. Шоҳ одамларига: — Мен ҳам сизлар билан бирга бораман, — деган эди,

³улар: — Биз билан борманг, — дейишди. — Борди–ю, қочишимизга тўғри келиб қолса, ғанимларимиз биз билан қизиқмайди. Ярмимиз ўлиб кетганимизда ҳам эътибор беришмайди. Сиз бизнинг ўн мингтамизга арзийсиз. Сиз бизга шаҳардан туриб ёрдам беринг, бизга шуниси яхши.