1 Solnomalar 29

¹Shoh Dovud butun jamoaga shunday dedi: “Xudo tanlagan o‘g‘lim Sulaymon hali yosh, tajribasiz, qiladigan ishi esa ulkandir, chunki bu koshona inson uchun emas, balki Egamiz Xudo uchundir.

²Egamiz uyining qurilishi uchun men qo‘limdan kelganicha oltin, kumush, bronza, temir, yog‘och, aqiq toshlar, bezak uchun firuza toshlar, rango–rang toshlar, har xil qimmatbaho toshlar va marmar yig‘dim.

³Endi esa, Xudoyimning uyiga bo‘lgan sadoqatimni ko‘rsatib, bularga qo‘shimcha qilgan holda shaxsiy xazinamdagi oltin va kumushni beraman.